ઈરાનના તેહરાન શહેરમાં રહેતી બાવીસ વર્ષની સહર તબર નામની યુવતી ઍન્જેલિના જોલીની ડાઇ હાર્ડ ફૅન હોવાથી તેના જેવા જ સુંદર દેખાવાની તેની ખ્વાહિશ હતી.
જો તેનો મૂળ ચહેરો જુઓ તો તે પોતે કંઈ ઓછી સુંદર નહોતી, પણ અમેરિકન ઍક્ટ્રેસ ઍન્જેલિના જોલી જેવા દેખાવાનું ભૂત તેના મગજ પર એવું સવાર થયેલું કે તેણે એક પછી એક નાની-મોટી પ્લાસ્ટિક સર્જરીઓની હારમાળા પોતાના જ શરીર પર શરૂ કરાવી દીધી. ઍન્જલિનાની જેમ શાર્પ જડબાં, પાઉટ પોઝ આપી શકાય એવા ભરાવદાર હોઠ, સહેજ ઊંચું અને તીણું નાક બનાવવા માટે તેણે સર્જરીનો સહારો લીધો હતો. ‘અલ અરેબિયા’ વર્તમાનપત્રમાં છપાયેલા અહેવાલ મુજબ સહરે લગભગ પચાસ કૉસ્મેટિક સર્જરીઓ કરાવી છે. સહર ખૂબ સ્ટ્રિક્ટ ડાયટિંગ કરીને પોતાનું વજન ૪૫ કિલોથી વધવા નથી દેતી. નવાઈની વાત એ છે કે આવો ભદ્દો લુક ધરાવતી છોકરીના ઇન્સ્ટાગ્રામ પર ૩.૧૮ લાખથી વધુ ફૉલોઅર્સ છે. જોકે કેટલાય લોકો તેના આ લુકની ભારોભાર ટીકા કરે છે અને ઝોમ્બી અને ડાકણ જેવા નામે ચિડાવે છે. એમ છતાં આ બહેન પોતાના શરીરના પ્રેમમાં છે અને ઇન્સ્ટાગ્રામ પર નિયમિત પોતાની તસવીરો પોસ્ટ કર્યે જાય છે. તેના જ ફૉલોઅર્સમાંના કેટલાક લોકો માને છે કે તેની મેકઅપ ટ્રિકને કારણે તે આવી લાગે છે.
